Nyabihu/Musanze: Baragerageza amafumbire ngo barebe aberanye n’ubutaka

Abahinzi bo mu turere twa Nyabihu na Musanze  bavuga ko ubu bamaze gusuzuma ubwoko butandukanye bw’amafumbire kugira ngo berebe aberanye n’ubutaka bwaho hanyuma babone uko bakora ubuhinzi bwabo bazi ifumbire yakoreshwa bitewe n’ubutaka.

Abaturage bagaragaza ko utu turima tw’ikitegererezo twatumye  basobanukirwa neza akamaro ndetse n’imikoreshereze y’inyongeramusaruro , bakemeza ko bizatuma barushaho kuzikoresha.

Ku rundi ruhande ariko, abaturage barasaba kurushaho koroherezwa kubona ifumbire kugira ngo babashe kuyitera bityo beze  imyaka nk’uko babyifuza.

Nyirambanjinka Alphonsine utuye mu karere ka Musanze yagize ati: “N’ubwo ntarasarura  na rimwe, ahazava imyaka harigaragaza cyane.  Aho nakoresheje imwe muri ariya mafumbire, ibishyimbo byaho bimeze neza. Namaze no kwemeza ko ariyo nzajya nkoresha kugeza ubu.”

Uyu mugore yemeza ko imwe mu mpamvu zituma abahinzi badakoresha amafumbire ari uko ihenda, bityo agasaba ko inzego zibishinzwe zarebera hamwe uko igiciro cy’ifumbire cyagabanyuka.

Undi muhinzi witwa Nzabuhoro Augustin utuye mu karere ka Nyabihu yagize ati: “Uko nabiboye inyongeramusaruro burya zifite akamaro.  Ubu mfite gahunda y’uko ninsarura aha hose nyuma  nzahahinga nkahashyira ifumbire nk’uko babinyeretse kuko n’ubwo ntarasarura bwa mbere umusaruro urigaragaza cyane rwose.”

Akamaro ko gusuzuma inyongeramusaruro iberanye n’ubutaka kurusha iyindi.

Musoni Celestin, ushinzwe ubuhinzi mu mushinga wa IFDC asobanura ko  ubu buryo bwo gusuzuma inyongeramusaruro zibereye umurima bukorwa hagabanywa uduce dutandukanye mu murima, ubundi tugashyirwamo amafumbire mvaruganda atandukanye ariko akunganirwa n’ifumbire y’imborera.

Yagize ati: “Nyuma yo kugereranya umusaruro wavuye muri utu turima umuhinzi yihitiramo ubwoko bw’inyongeramusaruro buberanye n’imiterere y’ubutaka bwe bityo akaba ariyo azakoresha mu murima we wose mu gihembwe k’ihinga gikurikiraho.”

Yibutsa abahinzi ko gukoresha inyongeramusaruro atari byo byonyine bituma umusaruro wiyongera, ahubwo  ko bagomba no gukoresha imbuto z’indobanure, bagahinga neza kandi,  ku gihe  no ku murongo.

Ngo ibi bizakumira  ibyonyi by’uburyo butandukanye kandi bitume ibihingwa byera bishishe.

Ku ruhande rw’ubuyobozi bw’utu turere  bavuga ko ubu buryo bugiye gufasha abaturage gusobanukirwa byimazeyo akamaro ko gukoresha inyongeramusaruro kuko bazaba babyibonera aho kubibwirwa mu magambo.

Jean Pierre Nyirimanzi ushinzwe ubuhinzi n’ubworozi mu karere ka Nyabihu yagize ati: “ Ubusanzwe kumvisha abahinzi akamaro k’amafumbire mva ruganda byatugoraga, ariko kubera ko utu turima tuzajya dutuma bo ubwabo bibonera itandukaniro bizatuma babyitabira bose ntawe usigaye.”

Abashakashatsi bagaragaza ko ubusanzwe ubutaka buba butandukanye bitewe n’uko bumeze, bityo bugakenera n’amafumbire atandukanye ngo bwere.

Umushinga IFDC wakoze uturima tw’ikitegererezo dusaga ibihumbi bitandatu mu gihembwe cy’ihinga B cya 2015 hirya no hino mu gihugu hagamijwe gusobanurira abahinzi uburyo buboneye bwo gukoresha inyongera musaruro hagendewe ku miterere itandukanye y’ubutaka.

Placide Hagenimana

UM– USEKE.RW