Muhanga: Hari serivisi zimwe abafite ubumuga badahabwa kwa muganga

Uyu ubwo amahugurwa y’iminsi itatu yahuje  abakozi b’urugaga rw’Imiryango y’Abantu bafite Ubumuga mu kurwanya SIDA(UPHLS) no guteza imbere ubuzima, hamwe n’abakozi  bo mu  bigo nderabuzima n’ibitaro byo  mu Ntara y’Amajyepfo yasozwaga, Perezida w’inama y’ubutegetsi y’uru rugaga, Niyomugabo Romalis, yavuze ko abafite ubumuga batavuga bahura n’ikibazo cyo kwipimisha kwa muganga kubera ko abaganga badasobanukiwe urwo rurimi.

Ikibitera ngo ni uko abaganga baba batazi ururimi rw’amarenga bityo abarwayi ntibabashe kobona serivise bifuza.

Hari kandi ngo n’abafite ubumuga bw’ingingo runaka batabasha kugera aho bahererwa serivise kubera inyubako ziba zarubatswe badatekerejweho ngo nabo bashyirirweho uburyo buborohereza.

Niyomugabo ashimira Leta ko hari ibyo yashyizeho byorohereza abafite ubumuga kubona serivisi zitandukanye bifuza kimwe n’abandi baturage bose mu gihugu mu nzego zitandukanye harimo n’uburezi, ariko agasaba ko hakongerwamo ingufu cyane cyane mu buvuzi.

Uyu muyobozi avuga ko guha ubumenyi bw’ibanze abafite aho bahurira n’ubuzima bishobora gutuma bafite ubumuga babona serivisi bifuza.

Yagize ati: « Hari igihe abaganga basoma amazina y’abarwayi, ugasanga abafite ubumuga bwo kutumva batabimenye.  Hari  n’amatangazo ndetse n’ibyapa bigaragaza aho serivisi iyi n’iyi itangirwa, ufite ubumuga bwo kutabona ntabimenye»

Uwimana Jean Paul, ukora mu kigo nderabuzima cya Nyarubaka mu Karere ka Kamonyi, avuga ko  kutamenya ururimi rw’amarenga ari yo mbogamizi abashinzwe ubuzima bahuraga nayo.

Gusa ariko ngo kuko ubu bahuguwe  mu gukoresha amarenga bagiye kugerageza kujya batanga serivise nziza ku babagana bafite ubumuga bwo kutavuga no kutumva.

Ibarura ryakozwe n’Ikigo cy’igihugu cy’ibarurishamibare mu mwaka wa 2012, ryerekanye ko abafite Ubumuga  ku rwego rw’igihugu barenga ibihumbi 400 gusa imibare iherutse gusohorwa na NCPD ivuga ko abafite ubumuga bashyizwe mu byiciro hashingiwe ku bumuga bwabo barenga gato ibihumbi 160.

Usibye  abakozi  bafite aho bahurira n’ubuzima mu ntara y’Amajyepfo, bahugurwaga mu gihe cy’iminsi itatu, uru rugaga  mu karere ka Muhanga rurahugura abakozi bashinzwe ubuzima  bo mu Ntara y’Iburengerazuba.

MUHIZI ELISEE

UM– USEKE.RW-Muhanga