Tony Blair yashinzwe kuyobora ikigo cyo kurwanya ivanguramoko i Burayi

Tony Blair yatangaje kuri uyu wa kane Kamena ko yagizwe umuyobozi w’ikigo cyo kurwanya ivanguramoko n’ivangura rikorerwa abayahudi ku mugabane w’Uburayi (European Council on Tolerance and Reconciliation).

Uyu mugabo wahoze ari Minisitiri w’Intebe w’Ubwongereza mu cyumweru gishize ye ku kuba intumwa y’ihuriro rya UN, USA, Umuryango w’Ubumwe bw’Uburayi n’Uburusiya mu karere k’uburasirazuba bwo hagati (moyen orient) kubera ibikorwa bitandukanye bw’ubushabitsi akora ahatandukanye ku isi.

Mu ijoro ryo kuri uyu wa gatatu rishyira kuwa kane nibwo byatangiye kuvugwa ko uyu mugabo agiye kuyobora kiriya kigo gishinzwe gushishikariza ibihugu by’i Burayi kurwanya ibikorwa bibi nk’ivanguramoko, ibikorwa bibi byibasira abayahudi ndetse n’ibyibasira abimukira bose mu bihugu by’iburayi.

Tony Blair afatwa nk’umwe mu nshuti z’u Rwanda, ni umujyanama w’ubushake wa Perezida Paul Kagame mu by’imiyoborere n’ubukungu.

Iki kigo kizakora ibikorwa byo gushishikariza ibihugu kwemeza nk’ibyaha amagambo abiba urwango n’ahakana Jenoside yakorewe Abayahudi, ndetse kinakore ubushakashatsi ku mpamvu zitera ubuhezanguni.

Iki kigo gifite ikicaro i Bruxelles, kivuga ko ibihe isi irimo bikomeye cyane kubera amateka ya vuba y’intambara z’isi ebyiri, Jenoside, ndetse n’ubuhezanguni bushingiye ku myemerere.

Mu burayi ubu bugarijwe n’irondamoko ryibasiye Abayahudi ndetse n’ibibazo bikomeye abimukira baganayo bari guhura nabyo by’urwango.

Amahoro y’uburayi na Aziya y’iburengerazuba ariko ngo yaba ari kure mu gihe intambara hagati ya Palestine na Israel ikomeje, intambara muri Syria isa n’idafite iherezo, ubuhezanguni bufitwe n’ababugereka ku idini ya Islam, ndetse n’ukuzamuka kw’umutwe wa Islamic stade muri Iraq.

Photo/A E Hatangimana/UM– USEKE

UM– USEKE.RW