Rayon yahaye Police FC amasaha 48 ku kibazo cya Sina Jerome

Nyuma y’uko ikipe ya Rayon Sport iguriye umukinnyi Sina Jerome byavugwaga ko haguzwe amasezerano yari afitanye n’ikipe ya Police FC  ariko bikarangira Sina Jerome yanze kujya i Nyanza, ubu ikipe ya Rayon Sport yahaye ya Police FC amasaha 48 ngo ibe imaze gukemura ikibazo cy’uyu rutahizamu w’umunyecongo  bitaba ibyo Rayon igasubizwa amafaranga yamutanzeho.

Nkuko bigaragara mu ibaruwa ikipe ya Rayon Sport yandikiye ikipe ya Police FC, Rayon irasaba  ko ishingiye ku masezerano bari bagiranye (Rayon Sports na Police FC ) tariki ya 17 Nzeri 2014 ,bagendeye ku ngingo yayo ya mbere  handitse ko “ikipe ya Police Fc ihaye umukinnyi  Sina Jerome  ikipe ya Rayon Sports igihe kingana n’imyaka ibiri” ni ukuvuga umwaka wa shampiyona wa 2014/2015 ndetse na 2015/2016 .

Mu ngingo yayo ya kabiri handitse ko “umukinnyi Sina Jerome azagengwa n’amasezerano yari afitanye n’ikipe yaPolice FC”. Rayon Sports ngo igendeye ku biri muri aya masezerano ikaba ibona atarubahirijwe  ikongeraho ko yabonye umwandukuro (copy) y’amasezerano ikipe ya Police FC yagiranye n’ikipe ya Darling Club Virunga  yo muri Congo (yareze uyu mukinnyi)  aho ingingo ya mbere muri ayo masezerano ivuga ko ikipe ya Virunga itije ikipe ya Poilice FC  umukinnyi Sina Jerome  igihe kingana n’umwaka umwe wa 2014/2015, ndetse  mu ngingo yayo ya 2  ikavuga  ko  Police FC  muri uwo mwaka itemerewe gutiza cyangwa kugurisha uyu mukinnyi mu gihe bitabanje kwemerwa n’ikipe ya DC Virunga.

Rayon Sport isoza ibaruwa Umuseke ufitiye Kopi ivuga ko yasanze ikipe ya Police FC yarihaye uburenganzira bwo kugurisha umukinnyi kandi ntaburenganzira imufiteho bityo Rayon Sports ikaba isaba ikipe ya Police FC gukemura ibi bibazo mbere y’itariki ya 16 Ukwakira 2014  ikabaha ibyangombwa byuzuye by’uyu mukinnyi bitaba ibyo ikabasubiza amafaranga yose yari yatanze kuri uyu mukinnyi wahawe ubwenegihugu bw’u Rwanda ngo akinire Amavubi.

Amakuru agera k’Umuseke avuga ko mbere y’uko yongera amasezerano y’uko atijwe muri Police FC avuye muri Virunga DC tariki ya 1 Nzeri 2014 ikipe ya Police yari yamenye amakuru ko Sina Jerome yatangiye kugirana ibiganiro  rwihishwa n’ikipe ya Rayon Sports maze yihutira kujya  (Police FC) mu ikipe ya Virunga DC  kongeza amasezerano yo gutizwa k’uyu mukinnyi.

Tariki ya 1 Nzeli 2014 nibwo Police FC yongereye amasezerano y’umwaka umwe nk’intizanyo imaze kwemeranya n’ikipe ya Virunga y’i Goma.

Police FC yaje kugira imbogamizi ubwo yafataga umwanzuro wo gusezerera abakinyi bavuzwe mu bibazo by’ubwenegihugu bahawe binyuranyije n’amategeko y’u Rwanda, muri aba bakinnyi na Sina Jerome yarimo, niko kwihutisha ibyo kumugurisha ku bamushaka, bivugwa ko Rayon Sports yamuguze miliyoni 11.

Umuvugizi wa Police FC CIP Mayira Jean de Dieu  avuga ko nyuma yo guhura n’ikibazo cy’ubwenegihugu bwa Sina Jerome bahise basaba uburenganzira ikipe ya  Virunga bemeranya ko uyu mukinnyi yajya muri Rayon Sports cyane ko Police FC yari yamaze kubishyura.

Mayira yagize ati “ Twabanje kubiganira n’ikipe ya Virunga kuko Sina atashoboraga kudukinira, batwemerera kumuha indi kipe ariko adasohotse mu gihugu cyacu, niyo mpamvu twamutanze mu ikipe ya Rayon Sports  kuko byashobokaga.”

Urujijo rukaba uburyo Police FC yemerewe gutiza umukinnyi muri Rayon Sports mu myaka ibiri kandi yaramutijwe umwaka umwe na Virunga DC.

Mayira avuga ko bo (Police FC) bari babwiye Rayon Sports ko nubwo bamubahaye imyaka ibiri ariko umwaka umwe nushira Rayon Sports izabanza ikajya i Congo kuvugana  na Virunga DC.

Mayira ati “ Twabiganiriyeho n’uwari uhagarariye Rayon Sports (Mayor Abdallah Murenzi) tubasobanurira ko umwaka nurangira bazajya kuvugana na DC Virunga kugirango Sina abakinire umwaka wa kabiri.”

Police FC buvuga ko nta kibazo bafitanye na Sina cyangwa Rayon Sports ko uyu mukinnyi yakabaye ari gukina no kwitozanya na bagenzi be i Nyanza.

DC Virunga ihakana ibyo kumvikana na Police FC gutanga Sina mu yindi kipe

Lofimbo Maombi Umunyamabanga mukuru w’ikipe ya DC Virunga yabwiye Umuseke ko Sina ari umukinnyi wabo batije muri Police FC umwaka umwe wa 2014/2015  ariko ahakana amakuru y’uko bumvikanye na Police FC ko imutiza muri ya Rayon Sports.

Maombi ati “ Nanjye naratunguwe kuba Sina yaragiye muri Rayon Sports twabibwiwe n’umukinnyi wirukanywe mu Rwanda, twumvise ko bamwohereje muri Rayon Sports kandi agace ka kabiri mu masezerano dufitanye na Police  kavuga ko atajya mu yindi kipe bitamenyeshejwe Virunga .”

Abajijwe icyo bagiye gukora mu gihe amasezerano atubahirijwe Maombi yavuze ko umwaka nurangira bazasubirana umukinnyi wabo kuko hari amakipe y’i Congo yamushakaga nka Sanga Balende, Darling Club Motema Pembe na Tout Puissant Mazembe.

Uburangare muri Rayon Sport?

Ikipe ya Rayon Sport ikimara kugura umukinnyi Jerome Sina yavuga  ko yaguze amasezerano ya Police FC na Sina Jerome,  ariko kuri uyu wa 15 Ukwakira ikipe ya Rayon Sports binyuze  ku muvugizi wayo yavuze ko amasezerano ikipe ya Police FC yagiranye n’ikipe ya DC Virunga batari bayazi.

Jean Paul NKURUNZIZA
UM– USEKE.RW