MUHAYIMANA Claude ukekwaho Genocide agiye koherezwa n’Ubufaransa

Mu itangazo ryashyizwe ahagaragara na ambassade y’u Rwanda mu Ubufaransa kuri uyu wa kane tariki 28 Werurwe, yatangaje ko yishimiye umwanzuro w’urukiko rw’i Rouen mu Ubufaransa wo kuba MUHAYIMANA Claude ukekwaho uruhare rukomeye muri Genocide yakorewe abatutsi mu Rwanda yakohererezwa ubutabera bwo mu Rwanda.

Icyumba cy’amabwiriza cy’urukiko rwa Rouen mu majyaruguru y’Ubufaransa cyemeje ko ibisabwa ngo Muhayimana yoherezwe byuzuye, ko ibyo aregwa nta mvo za politiki zirimo ahubwo ari ibyaha byibasiye inyoko muntu kandi ko inkiko zo mu Rwanda zujuje ibisabwa mu kurengera uburenganzira bw’ikiremwamuntu bityo nta mpamvu yo kutamwohereza.

Urukiko rw’i Rouen rwibukije ko ibyo rwanzuye bishimangira imyanzuro yari yafashwe n’urukiko rw’uburenganzira bw’ikiremwamuntu rw’Uburayi tariki 27 Ukwakira 2011, ndetse n’urukiko mpuzamahanga mpanabyaha rwashyiriweho u Rwanda rwemeje tariki 16 Ukuboza 2011.

Ambassade y’u Rwanda mu Ubufaransa yatangaje ko yishimiye uyu mwanzuro w’ubutabera bw’Ubufaransa wo kohereza ukekwaho uruhare muri Genocide kuburanira aho yaba yarakorewe ibyaha. Ambassade y’u Rwanda i Paris, yemeje ko bitanga icyizere ko n’abandi basabwe koherezwa imbere y’ubutabera bw’u Rwanda amaherezo nabo bazoherezwa.

Ubuyobozi bwa Ambassade y’u Rwanda mu bufaransa, bwemeza ko abanyarwanda bazagera ku bwiyunge bwa nyabwo koko igihe abagize uruhare muri Genocide yakorewe abatutsi mu 1994 bazaba barabiryojwe n’ubutabera, bw’u Rwanda cyangwa bw’ibihugu barimo.

Nubwo ruriya rukiko rw’i Rouen rwanzuye ko Muhayimana yakoherezwa, ntirwategetse cyangwa ngo rutangaze amatariki uyu mugabo yakoherezwa mu Rwanda.

Ubwanditsi
UM– USEKE.COM